දීර්ඝ ගුවන් ගමන්වල නව මානයක් විවර කරන මෙම ඓතිහාසික ජයග්‍රහණය, ජාත්‍යන්තර ගුවන් යානා සම්මේලනය (International Aeronautical Federation) සහ flightradar24 දත්ත මගින් ද ස්වාධීනව තහවුරු කර අවසන්.
AIB35LR යන ඇමතුම් සංකේතයෙන් (call-sign) යුත් මෙම සුවිශේෂී ගුවන් යානය සිය ඓතිහාසික ගමන ආරම්භ කළේ ජූලි 27 වැනි සඳුදා දේශීය වේලාවෙන් පස්වරු 17.27ට ඕස්ට්‍රේලියාවේ මෙල්බර්න් නුවරින්. අඛණ්ඩව පැය 24යි මිනිත්තු 24ක කාලයක් අහසේ රැඳෙමින්, නාවික සැතපුම් 12,503ක (කිලෝමීටර් 23,155ක) අතිවිශාල දුරක් ගෙවා දැමූ යානය, ජූලි 28 වැනි අඟහරුවාදා දේශීය වේලාවෙන් පෙරවරු 09.51ට ප්‍රංශයේ ටූලූස් (Toulouse) වෙත සාර්ථකව ගොඩබස්වනු ලැබුවා.
මෙම ගමනේ වඩාත්ම සිත්ගන්නාසුළු අත්දැකීම වන්නේ එය ගමන් කළ මාර්ගයයි. මෙල්බර්න් නුවරින් ගුවන්ගත වීමෙන් පසු සිඩ්නි නුවරට ඉහළින් පැසිෆික් සාගරය තරණය කරමින් ලොස් ඇන්ජලීස් දෙසට පියාසර කළ යානය, අනතුරුව උතුරු ඇමරිකානු මහාද්වීපය සහ අත්ලාන්තික් සාගරය හරහා ගමන් කර ලන්ඩන් නුවරට ඉහළින් ටූලූස් වෙත ළඟා වුණා. මහාද්වීප තුනක් සහ සාගර දෙකක් හරහා පියාසර කළ මෙම අපූරු ගමනේදී, ගුවන් යානයේ සිටි කාර්ය මණ්ඩලයට එකම ගමනක් තුළ හිරු බැස යෑම් දෙකක් සහ හිරු උදා වීම් දෙකක් සියැසින් දැකගැනීමේ දුර්ලභ අවස්ථාව ද හිමිව තිබෙනවා.
ලෝක ගුවන් ගමන් ක්ෂේත්‍රයේ සන්ධිස්ථානයක් වූ මෙම විශේෂ පරීක්ෂණ ගුවන් ගමන සඳහා 13 දෙනෙකුගෙන් යුත් විශේෂඥ කණ්ඩායමක් එක්ව සිටියා. ඒ අතරට Airbus පරීක්ෂණ නියමුවන් තිදෙනෙකු, Qantas ගුවන් නියමුවන් දෙදෙනෙකු, Airbus ගුවන් පරීක්ෂණ ඉංජිනේරුවන් පස්දෙනෙකු, සැලසුම් ඉංජිනේරුවන් දෙදෙනෙකු මෙන්ම ජාත්‍යන්තර ගුවන් යානා සම්මේලනයේ නියෝජිතයෙකු ද ඇතුළත්. අනාගතයේදී ලොව ඕනෑම තැනකට අතරමැදි නැවතුම්පොළවල් නොමැතිව ඉතා පහසුවෙන් සහ වේගයෙන් ළඟා වීමට සිහින දකින සංචාරකයින්ට මෙම ජයග්‍රහණය නව බලාපොරොත්තුවක් එක් කරනු නොඅනුමානයි.
