නිවසට ප්රියමනාප බවක් එක් කරන 'ස්නේක් ප්ලාන්ට්' (Snake Plant) මානසික සුවය සඳහා කදිම තේරීමකි. විශේෂයෙන්ම රාත්රී කාලයේදී පවා ඔක්සිජන් පිට කිරීමේ හැකියාව ඇති මෙම ශාකය, ඔබව සුවදායී නින්දකට යොමු කිරීමට උපකාරී වේ. ඔබ උදෑසන අවදි වන විට වඩාත් ප්රබෝධමත්ව දැනෙන්නට මෙය රුකුලක් වන අතර, එය රැකබලා ගැනීමද ඉතා පහසු බැවින් ඔබේ කාර්යබහුල දිනචරියාවට කිසිදු බාධාවක් නොවනු ඇත.
තවත් අපූරු ශාකයක් ලෙස 'පීස් ලිලී' (Peace Lily) හැඳින්විය හැකිය. එහි ඇති සුදු පැහැති මල් සහ තද කොළ පැහැති පත්ර මගින් ඔබේ නිවසට අමුතුම සන්සුන් බවක් සහ ගෞරවනීය බවක් එක් කරයි. වාතයේ ඇති විෂ ද්රව්ය ඉවත් කර වාතය පිරිසිදු කිරීමට ඇති හැකියාව නිසා පීස් ලිලී ඔබේ නිවසේ වාතයේ ගුණාත්මකභාවය ඉහළ නංවයි. පිරිසිදු වාතය සහ සොබාදහමේ සෞන්දර්යය එකතු වූ විට, එය ඔබේ කාංසාව සහ ආතතිය අඩු කිරීමට සෘජුවම බලපාන බව බොහෝ දෙනා අත්දැකීමෙන් දන්නා කරුණකි.
සිතේ සතුට සහ සාමය පවත්වා ගැනීමට 'ගෝල්ඩන් පොතෝස්' (Golden Pothos) හෙවත් 'මනි ප්ලාන්ට්' වැනි වැල් වර්ගද ඉතා සුදුසුයි. මේසයක් මත හෝ රාක්කයක එල්ලා තැබිය හැකි මෙම ශාක මගින් නිවසට සජීවී බවක් එක් කරයි. දවස පුරා පරිගණකය හෝ ලැප්ටොප් තිරය දෙස බලා සිටීමෙන් ඇති වන නෙත් වෙහෙස සහ මානසික තෙහෙට්ටුව මකා දැමීමට, ඔබේ මේසය මත තිබෙන මේ කුඩා පත්ර කිහිපයට ඇසිපිය හෙළන තරම් කෙටි කාලයකදී වුවත් හැකියාව ඇත.
කෝමාරිකා යනු සෞඛ්යමය ප්රතිලාභ රැසක් ඇති ශාකයක් පමණක් නොව, මානසික සුවය සඳහාද ඉතාම සුදුසු Indoor ශාකයක් ලෙස තිබෙනවා. මෙම ශාකය රාත්රී කාලයේදී වැඩිපුර ඔක්සිජන් පිට කරන නිසා ඔබේ නිදන කාමරයේ තබා ගැනීමට මෙය කදිම තේරීමක්.
අවසාන වශයෙන්, ඔබ මතක තබාගත යුතු කරුණ නම් ශාකයක් යනු හුදෙක් අලංකාර භාණ්ඩයක් පමණක් නොවන බවයි. එය ඔබත් සමඟ ජීවත් වන සජීවී මිතුරෙකි. දිනපතා ඔබේ ශාක වලට වතුර දමමින්, පත්ර පිරිසිදු කරමින් ගත කරන ඒ සුළු මොහොත පවා ඔබට 'මනෝභාවය පිළිබඳව අවධානය යොමු කිරීමේ' (Mindfulness) පුරුද්දක් වනු ඇත. ඔබේ නිවසේ කොනක ඇති කුඩාම පැළෑටිය පවා, ඔබේ මානසික සුවතාවය වෙනුවෙන් විශාල වෙනසක් සිදු කරනු නොඅනුමානය.
