කෙසේ වෙතත්, නවතම පර්යේෂණ මඟින් හඳුන්වා දී ඇති "සිලෙබෙසිරන්" (Zilebesiran) නමැති එන්නත හරහා වසරකට දෙවතාවක් පමණක් ලබා ගන්නා මාත්රාවකින් රුධිර පීඩනය ස්ථාවරව පවත්වා ගැනීමට හැකි බව තහවුරු වී තිබේ.
මෙම එන්නත නිර්මාණය කර ඇත්තේ 'RNA මැදිහත්කරණය' (RNA Interference - RNAi) නමැති නවීන තාක්ෂණය උපයෝගී කර ගනිමිනි. අපගේ ශරීරයේ රුධිර පීඩනය ඉහළ නැංවීමට බලපාන 'ඇන්ජියෝටෙන්සිනොජන්' (Angiotensinogen) නමැති හෝමෝනය අක්මාව මඟින් නිපදවනු ලබයි. මෙම එන්නත මඟින් අදාළ හෝමෝනය නිපදවීමට උපදෙස් දෙන ජානමය පණිවිඩය තාවකාලිකව අක්රීය කරයි. එවිට ශරීරයේ රුධිර පීඩනය ස්වභාවිකවම අඩු මට්ටමක පවත්වා ගැනීමට හැකි වේ.
සාම්ප්රදායික පෙති වර්ග ශරීරය තුළ පවතින්නේ පැය කිහිපයක් පමණක් වුවද, මෙම එන්නතෙහි බලපෑම මාස හයක් වැනි දිගු කාලයක් ශරීරය තුළ රඳා පවතී. මෙහි ඇති විශේෂත්වය වන්නේ රෝගියාට දිනපතා බෙහෙත් බීමට අමතක වීම පිළිබඳව බියක් ඇති කර ගැනීමට අවශ්ය නොවීමයි.
ලෝක සෞඛ්ය සංවිධානයට අනුව ලොව පුරා බිලියන 1.3ක ජනතාවක් අධික රුධිර පීඩනයෙන් පෙළෙන අතර ඉන් අඩකට වඩා පිරිසක් තමන්ට රෝගය ඇති බව හෝ නොදනිති. රෝගය හඳුනාගත් පිරිසගෙන් ද නිසි ලෙස ප්රතිකාර ලබා ගන්නේ සුළු පිරිසකි. මෙම නව එන්නත මඟින් ප්රතිකාර ලබා ගැනීමේ ක්රියාවලිය ඉතා සරල වන බැවින්, රුධිර පීඩනය නිසා ඇති වන හෘදයාබාධ සහ වකුගඩු ආබාධ විශාල වශයෙන් අවම කර ගත හැකිය. විශේෂයෙන්ම සංවර්ධනය වෙමින් පවතින රටවල ජනතාවට මෙය ඉතා සහනදායී විසඳුමක් වනු ඇත.
බ්රිතාන්යයේ ලන්ඩන් ක්වීන් මේරි විශ්වවිද්යාලය ඇතුළු ප්රමුඛ පෙළේ පර්යේෂණ ආයතන කිහිපයක් එක්ව සිදු කරන ලද සායනික පරීක්ෂණවලින් පෙනී ගොස් ඇත්තේ මෙම එන්නත ලබා දුන් රෝගීන්ගේ රුධිර පීඩනය මාස හයක් පුරා ඉතා ආරක්ෂිතව සහ ස්ථාවරව අඩු මට්ටමක පැවති බවයි.
දැනට මෙම එන්නත සායනික පරීක්ෂණවල දෙවන අදියර සාර්ථකව අවසන් කර ඇත. ඉදිරි වසර කිහිපය තුළ එය සාමාන්ය ජනතාව වෙත නිකුත් කිරීමට පෙර තවදුරටත් එහි ආරක්ෂිතභාවය සහ අතුරු ආබාධ පිළිබඳව අධ්යයනය කෙරේ. මෙහි ඇති විය හැකි ප්රධානතම අභියෝගය වන්නේ එන්නතක මිල පෙති වර්ගයකට වඩා වැඩි විය හැකි වීමයි. නමුත් දීර්ඝකාලීනව රෝහල් ගත වීම් සහ බරපතල රෝගාබාධ වළක්වා ගැනීම තුළින් ලැබෙන ආර්ථික වාසිය ඊට වඩා වැඩි වනු ඇතැයි විද්යාඥයෝ විශ්වාස කරති.
