විශේෂඥ වෛද්ය අයිසා ජමිල් පවසන පරිදි, මුහුණේ ඉදිමුමට ප්රධානතම හේතුව වන්නේ සිරුරේ දියර රඳා පැවතීමයි (Fluid retention). මේ සඳහා ලුණු අධික ආහාර, මධ්යසාර භාවිතය, නින්ද නොමැතිකම සහ විවිධ අසාත්මිකතා සෘජුවම බලපානු ලබයි.
අයිස් සත්කාර ඇත්තටම සාර්ථකද?
අයිස් ජලයෙන් මුහුණ සේදීම හෝ අයිස් කැට භාවිතය මගින් සමේ රුධිර නාල හැකිළීමකට ලක්වන නිසා ඉදිමුම අඩු වී පෙනෙන බව විශේෂඥ වෛද්ය ටීනා ටියෑන් පවසයි. මෙය උදෑසන කාලයේදී මුහුණට ප්රාණවත් බවක් ලබා දුන්නත්, එහි බලපෑම පවතින්නේ පැය කිහිපයක් වැනි කෙටි කාලයක් පමණි.
තවද, අධික ලෙස අයිස් භාවිත කිරීමෙන් සංවේදී සමක් ඇති අයට හානි සිදුවිය හැකි අතර රොසේසියා (Rosacea) වැනි චර්ම රෝග තත්ත්වයන් උත්සන්න විය හැකියි. ඒ නිසා ඉතා සීතල වතුරට වඩා මඳක් සිසිල් ජලය භාවිත කිරීම වඩාත් ආරක්ෂිත වේ.
Gua Sha සහ Facial Rollers මගින් මුහුණේ හැඩය වෙනස් කළ හැකිද?
වර්තමානයේ බොහෝ දෙනෙක් Gua Sha ගල් සහ රෝලර් භාවිත කරන්නේ මුහුණේ හැඩය ස්ථිරවම වෙනස් කරගත හැකි යැයි සිතාගෙනයි. නමුත් වෛද්යවරුන් පවසන්නේ මෙමගින් මුහුණේ හැඩය හෝ ඇටසැකිල්ලේ ස්වභාවය වෙනස් කළ නොහැකි බවයි.
කෙසේ වෙතත්, ක්රමානුකූලව මෙම මෙවලම් භාවිතයෙන් මුහුණ පිරිමැදීම මගින් වසා පද්ධතියේ දියර බැස යාම උත්තේජනය කළ හැකියි. මෙය මුහුණේ රැඳී ඇති අතිරික්ත දියර ඉවත් කර තාවකාලිකව මුහුණ සිහින් කර පෙන්වීමට උදවු වෙයි. මෙහිදී අධික ලෙස තෙරපුමක් ලබා දීමෙන් සමේ සියුම් රුධිර නාලවලට හානි විය හැකි බැවින් ඉතා මෘදුව මෙය කළ යුතුය.
කැෆේන්අඩංගු ක්රීම් වර්ගවල රහස
ඇස් යට ඉදිමුම සහ කළු වීම අවම කිරීමට කැෆේන් අඩංගු අයි ක්රීම් භාවිතය විද්යාත්මකව යම්තාක් දුරට තහවුරු වූ ක්රමයකි. කැෆේන් මගින් රුධිර නාල පටු කරන නිසා ඇස් වටා ඇති ඉදිමුම ඉක්මනින් අඩු කරගත හැකියි. මේ සඳහා මිල අධික ක්රීම් වර්ග වෙනුවට ශීත කළ තේ පැකට් හෝ සීතල හැන්දක් භාවිත කිරීමෙන් ද සමාන ප්රතිඵලයක් ලබාගත හැකි බව වෛද්යවරු පෙන්වා දෙති.
අවසාන වශයෙන්, මෙම සියලු ක්රම තාවකාලික විසඳුම් පමණි. මුහුණේ ඉදිමුම ස්ථිරවම පාලනය කිරීමට නම් රාත්රී කාලයේ ලුණු භාවිතය අඩු කිරීම, ප්රමාණවත් නින්දක් ලබා ගැනීම සහ නිදාගන්නා විට හිස මඳක් ඉහළින් තබා ගැනීම වැනි සෞඛ්ය සම්පන්න පුරුදු ඇති කරගත යුතුය. යම් හෙයකින් මුහුණේ ඉදිමුම වේදනාකාරී නම් හෝ සිරුරේ වෙනත් තැන්වලත් ඉදිමුම පවතී නම්, වහාම වෛද්ය උපදෙස් ලබා ගැනීම අත්යවශ්ය වේ.
