ගුණාත්මක කාලය වෙන් කිරීම
ඔබ දවස පුරා කොතරම් කාර්යබහුල වුවත්, දිනකට අවම වශයෙන් විනාඩි 20ක් වත් දරුවා වෙනුවෙන්ම වෙන් කරන්න. එහිදී දුරකථනය හෝ වෙනත් බාහිර බාධාවලින් තොරව ඔවුන් පවසන දේට සවන් දෙන්න. දරුවාට තමන් "වැදගත්" බව දැනෙන්නට හැරීම ඔවුන්ගේ ආත්ම විශ්වාසය ඉහළ නැංවීමටත්, මානසික ආතතිය අඩු කිරීමටත් උපකාරී වේ.
කෘතඥතාව හුරු කරවීම
සෘණාත්මක සිතුවිලිවලින් මිදීමට ඇති හොඳම මග කෘතඥ වීමයි. රාත්රී ආහාර වේලාවේදී හෝ නින්දට පෙර "අද දවසේ සිදුවූ හොඳම දේවල් 3ක්" ගැන කතා කරන්න දරුවාට උගන්වන්න. එමගින් ඕනෑම අසීරු තත්ත්වයක වුවද සුබවාදී දෙයක් දැකීමට ඔවුන්ගේ මනස හුරු වේ.
වැරදීම් යනු අසාර්ථකත්වය නොවන බව තේරුම් කර දීම
තරගකාරී සමාජයක දරුවන් බොහෝ විට පසුබසින්නේ "මම පැරදුණා" යන සිතුවිල්ල නිසාවෙනි. වැරදීමක් යනු අලුත් දෙයක් ඉගෙන ගැනීමට ලැබුණු අවස්ථාවක් බව ඔවුන්ට වටහා දෙන්න. වැරදුණු විට දොස් නැගීම වෙනුවට, "ඊළඟ වතාවේ අපි මේක මීට වඩා හොඳට කරන්නේ කොහොමද?" යන්න ඔවුන් සමඟ සාකච්ඡා කරන්න.
ඔබ ඔවුන්ට ආදර්ශයක් වන්න
දරුවන් ඉගෙන ගන්නේ ඔබ පවසන දෙයින් නොව, ඔබ කරන දෙයිනි. ඔබ පීඩනය හමුවේ නොසැලී, ධනාත්මකව ප්රශ්න විසඳන අයුරු දරුවාට පෙනෙන්නට හැරීම ඔවුන්ට ලබා දිය හැකි ලොකුම අධ්යාපනයයි. ඔබේ මානසික සෞඛ්යය ගැන සැලකිලිමත් වීම මගින් වක්රව ඔබේ දරුවාගේ මානසික ශක්තිය ගොඩනැගේ.
තාක්ෂණය පාලනය සහ ස්වභාවධර්මය සමඟ කාලය ගත කිරිම
නිරන්තරයෙන් තිර දෙස බලා සිටීම දරුවන්ගේ මානසික ඒකාග්රතාවය බිඳ දැමීමට හේතු වේ. සති අන්තයේ හෝ සවස් කාලයේ දරුවන් සමඟ ස්වභාවික පරිසරයේ කාලය ගත කරන්න. සෙල්ලම් කිරීම, ගස් වැල් සමඟ ගැවසීම දරුවාගේ සෘණාත්මක සිතුවිලි දුරු කර මනස සැහැල්ලු කිරීමට මහඟු පිටුවහලක් වනු ඇත.
දරුවෙකුට ලබා දිය හැකි වටිනාම දායාදය වන්නේ මිල අධික සෙල්ලම් බඩු හෝ නවීන තාක්ෂණික මෙවලම් නොව, ඔබේ ආදරය, කාලය සහ අවධානයයි. කුඩා කල සිටම ඔවුන්ගේ මානසික සුවතාවය වෙනුවෙන් ඔබ කරන මෙම කැපකිරීම්, අනාගතයේදී ඔවුන්ව සමාජයට බිය නොවන, අභියෝග හමුවේ නොසැලෙන ශක්තිමත් පුද්ගලයන් බවට පත් කරනු ඇත.
