ළමා පිටියෙන් ඇරඹි ගායන දිවිය...
චන්ද්‍රාණි ගුණවර්ධන මහත්මියගේ ගායන දිවිය ඇරඹෙන්නේ ගුවන් විදුලියේ ළමා පිටිය වැඩසටහන තුළිනි. එදා මෙදාතුර බොහෝ දෙනාගේ සිත් තුළ සදාකාලිකව රැඳී ඇති ඇගේ ගීත අතරින්, "දැන් නිවාඩු කාලේ හින්දා නෑ ඉස්කෝලේ" ගීතය සුවිශේෂී වේ. 1955 වසරේදී ඇයගේ හඬින් ගැයුණු මේ ගීතය මුලින්ම තැටි ගත කර තිබූ අතර, එය අදටත් ළමා මෙන්ම වැඩිහිටි පරපුර අතර ද මහත් ජනප්‍රියත්වයක් උසුලයි.
මතකයේ රැඳුණු ජනප්‍රිය ගීත...
ඇය සිය ගායන දිවිය තුළ රසික ආකර්ශනය දිනාගත් ගීත ගණනාවක්ම අපට දායාද කළාය. ඒ අතර, "හැඩකාරයි මං පොඩි කාලේ", "මල් කෙල්ලක් මං", "තුන් තුඹ මල් තුඹ මල්", "රාං කුරුල්ලා රාං කියාගෙන", "අත්තන මල් අත්තන මල්", "මලක සුවඳ සිව්සිය ගව්", "විහාර මහා දේවී සෝමාදේවි", "ලය තුළ නළියන", "ආයුබෝවන් වාසනාවන්", "තරුවක් වුණානම්", "අක්කා නගා ලගේ බොළඳ සිනා" සහ "දම් පැහැ වීදුරු පුංචි වළල්ලක්" වැනි ගීත ඇගේ ගීතාවලියේ ස්වර්ණමය සලකුණු තබන්නට සමත් විය.
චන්ද්‍රාණි ගුණවර්ධන මහත්මියගේ වියෝව ලාංකේය සංගීත ක්ෂේත්‍රයට විශාල පාඩුවක් වන අතර, ඇගේ සුමධුර ගීත සදාකාලිකව රසික හදවත් තුළ නොමැකී පවතිනු ඇත.
