දවසින් දවස අලුත් වෙන ෆේස්බුක්: AI Glasses සමඟ නවමු ආරම්භයක්

ෆේස්බුක්, ඉන්ස්ටග්‍රෑම් සහ වට්ස්ඇප් සමාගම් වල හිමිකාරීත්වය දරන Meta සමාගම, කෘතිම බුද්ධිය භාවිතා කරලා හදපු අලුත්ම ස්මාර්ට් කණ්ණාඩි යුවලක් මේ දවස්වල එළිදැක්වුවා.

මේ කණ්ණාඩි මෙටා සමාගමේ ප්‍රධානියා වන මාර්ක් සකර්බර්ග් විසින් ඔවුන්ගේ වාර්ෂික සංවර්ධක සමුළුවක් වන "Meta Connect" වලදී තමයි නිවේදනය කලේ. මේ උපාංග හදලා තියෙන්නේ Ray-Ban සහ Oakley වගේ ප්‍රසිද්ධ අව් කණ්ණාඩි සන්නාමයන් එක්ක එකතු වෙලා.

මේ කණ්ණාඩි වල විශේෂම දේ තමයි, මේකේ තියෙන AI තාක්ෂණය. මේවා ඇත්තටම විද්‍යාත්මක ඉදිරි ගමනක් කියලා තමයි සකර්බර්ග් කියන්නේ. මේ කණ්ණාඩියේ එක කාචයක වීඩියෝ කෝල් ගන්න සහ පණිවිඩ බලන්න පුළුවන් High-Resolution තිරයක් තියෙනවා. මෙගාපික්සල් 12ක කැමරාවක් තියෙන නිසා, ෆොටෝ සහ වීඩියෝ ගන්නත් පුළුවන්.

මේ කණ්ණාඩි වල මිල ඇමරිකානු ඩොලර් 799ක් විතර වෙනවා. මේක මෙටා සමාගමේ කලින් ස්මාර්ට් කණ්ණාඩි වලට වඩා ගොඩක් මිල වැඩියි.

විශ්ලේෂකයන් කියන විදියට මේ ස්මාර්ට් කණ්ණාඩි, මෙටා සමාගමේ බිලියන ගණනක් වටිනා Metaverse ව්‍යාපෘතියට වඩා සාර්ථක වෙන්න පුළුවන්. මොකද, VR හෙඩ්සෙට් වගේ නොවී, මේ කණ්ණාඩි එදිනෙදා ජීවිතයේදී පාවිච්චි කරන්න පහසුයි.

ඒත්, තවමත් බොහෝ දෙනෙක් මෙවැනි AI තාක්ෂණය තියෙන කණ්ණාඩි පාවිච්චි කරන්න පෙළඹෙයිද කියලා ප්‍රශ්නයක් තියෙනවා. මොකද, Ray-Ban කණ්ණාඩි ජනප්‍රිය වුනේ ඒවා පාවිච්චි කරන්න ලේසි, මිල අඩු සහ එදිනෙදා ජීවිතයට ගැලපෙන නිසා.

සකර්බර්ග් ක්‍රීඩා ලෝලීන් සඳහා ඩොලර් 499ක් වටිනා Oakley Meta Vanguard කණ්ණාඩි සහ ඩොලර් 379ක් වටිනා දෙවන පරම්පරාවේ Ray-Ban Meta කණ්ණාඩිත් එළිදැක්වූවා.

මේ අලුත් ස්මාර්ට් කණ්ණාඩි වලට අමතරව මෙටා සමාගම තමන්ගේ AI මෙහෙයුම් දියුණු කරන්න විශාල මුදලක් වියදම් කරනවා. ඇමරිකාවේ විශාල AI දත්ත මධ්‍යස්ථාන හදන්න බිලියන ගණනක් වියදම් කරනවා. ඒ වගේම, තරඟකාරී සමාගම් වලට වැඩිය දක්ෂතා තියෙන අයව බඳවා ගන්නත් මෙටා සමාගම මහන්සි වෙනවා.

මේ වගේ අලුත් නිෂ්පාදනයක් එළිදැක්වීම මෙටා සමාගමට අභියෝගයක්. මොකද මේ දවස්වල සමාජ මාධ්‍ය නිසා දරුවන්ට සිදුවන හානි ගැන විශාල විරෝධයක් තියෙනවා.

කෙසේ වෙතත්, අලුත් AI තාක්ෂණය තියෙන මේ කණ්ණාඩි, සමාජයට කොයි විදියට බලපායිද කියලා බලන්න තව කාලයක් යනවා ඇති. ඒත්, තාක්ෂණයේ දියුණුව කොච්චර වේගයෙන් සිදුවෙනවාද කියන එකට මේක හොඳ උදාහරණයක්.