මෑතකදී විශ්වවිද්යාලයක කරන ලද නව පර්යේෂණයකින් මිනිසුන්ගේ අරමුණුවල විවිධ වර්ග සහ ඒවායේ බලපෑම් පිළිබඳව පුළුල් ලෙස අධ්යයනය කර තිබෙනවා. 'Journal of Humanistic Psychology' සඟරාවේ ප්රකාශයට පත් කරන ලද මෙම අධ්යයනය සඳහා පුද්ගලයින් 528 දෙනෙකුගේ සහභාගීත්වයෙන් සමීක්ෂණයක් පවත්වා ඇති අතර, විවිධ අරමුණු වර්ග හඳුනාගත හැකිද යන්න සහ ඒවායේ ප්රතිඵල වෙනස් වන්නේ මන්ද යන්න පරීක්ෂා කර තිබෙනවා.
මෙම පර්යේෂණය මඟින් අරමුණු ප්රධාන වර්ග හතකට වර්ග කර තිබෙනවා. ඒ අතර කිසිදු අරමුණක් නොමැති වීම, පැවැත්ම සඳහා වන අරමුණ, ආගමික අරමුණ, පුද්ගලික හා ධනය රැස්කිරීමේ අරමුණ, අන් අයට උපකාර කිරීමේ පරාර්ථකාමී අරමුණ, ස්වයං-ප්රසාරණ අරමුණ සහ අධ්යාත්මික නැඹුරුවක් ඇති 'Transpersonal' අරමුණ යන කාණ්ඩ ඇතුළත් වෙනවා.
බොහෝ දෙනෙක් ප්රධාන අරමුණු වර්ගයක් වටා කේන්ද්රගත වී සිටින බවත්, සාමාන්ය ජනතාව අතර වඩාත්ම පොදු අරමුණු වන්නේ ස්වයං-ප්රසාරණ අරමුණ සහ පරාර්ථකාමී අරමුණ බවත් මෙම පර්යේෂණයෙන් අනාවරණය වී තිබෙනවා. වයස සහ ස්ත්රී-පුරුෂ භාවය මත මෙම අරමුණු වෙනස් වන අතර, වයසට යත්ම අන් අයට උපකාර කිරීමේ සහ අධ්යාත්මික අරමුණු වැඩි වන බව දැකගත හැකියි.
සතුට සහ අරමුණු අතර සම්බන්ධය සලකා බැලීමේදී, ධනය සහ කීර්තිය ලුහුබැඳීම සතුටට හේතු වේ යැයි යන සංස්කෘතික මතය මෙම අධ්යයනයෙන් ප්රතික්ෂේප කර තිබෙනවා. ඒ වෙනුවට පරාර්ථකාමීත්වය සහ අධ්යාත්මික නැඹුරුවක් ඇති අරමුණු මඟින් පුද්ගලයෙකුට සැබෑ සතුට සහ මානසික සුවය ළඟා කරගත හැකි බව පෙන්වා දී තිබෙනවා.
අපගේ ජීවිතය හැඩගස්වා ගැනීමට අවශ්ය අරමුණ බොහෝ දුරට අපගේ තේරීමක් වන අතර, ගැටළුවලින් ඔබ්බට ගොස් පෞද්ගලික වර්ධනයට මෙන්ම සමාජ යහපතට දායක වන අරමුණු තෝරා ගැනීමෙන් වඩාත් සතුටින් පිරි අර්ථවත් ජීවිතයක් ගත කළ හැකි බව මෙමඟින් අවධාරණය කර තිබෙනවා.
