හොලිවුඩ් හි පිහිටි නෙට්ෆ්ලික්ස් මූලස්ථානයේ අයිකන් ටවර් සහ එපික් ගොඩනැගිලිවල ගබඩා කාමර දෙකක් ජෑම් බෝතල්, ඉටිපන්දම්, වයින් සහ මේගන්ගේ ප්රසිද්ධ මල් පෙති ඉසින උපාංග වැනි නිෂ්පාදනවලින් පිරී පවතින බව මූලාශ්ර හෙළි කර තිබේ. ඇතැම් සේවකයින් මෙම නිෂ්පාදන 10 ක් පමණ නොමිලේ රැගෙන ගොස් ඇති බවත්, එහි අධික තොගයක් පවතින බවත් වාර්තා වේ.
මෙම නිෂ්පාදන තොග පිළිබඳව විවිධ මත පළවෙමින් පවතී. ඇතැම් මූලාශ්ර පවසන්නේ නිෂ්පාදන තොග මීට පෙර වෙනත් ගබඩාවකට ගෙන ගිය බවත්, දැනට නෙට්ෆ්ලික්ස් මූලස්ථානයේ ඉතිරිව ඇත්තේ තෑගි ලෙස දීමට සහ ප්රවර්ධන කටයුතු සඳහා වෙන් කළ දේවල් පමණක් බවත්ය.
කෙසේ වෙතත්, පසුගිය මාසයේ වෙබ් අඩවියක ඇති වූ දෝෂයක් හේතුවෙන් අලෙවි නොවූ නිෂ්පාදන 650,000 ක් පමණ ගබඩාවල පවතින බව හෙළි විය. ඒ අතර ජෑම් බෝතල් 220,000 ක්, මී පැණි බෝතල් 30,000 ක් සහ වයින් බෝතල් 70,000 ක් ඇතුළත් බව සඳහන් වේ.
මේගන්ගේ 'As Ever' සන්නාමයේ නිෂ්පාදන ඉහළ මිල ගණන් යටතේ අලෙවි කෙරේ. ජෑම් සහ තේ පෙට්ටියක් අමෙරිකානු ඩොලර් 14 ක් වන අතර, ඉටිපන්දමක් ඩොලර් 64 ක් සහ Brut වයින් බෝතලයක් ඩොලර් 89 ක් වැනි ඉහළ අගයක පවතී.
රෙඩිට් පරිශීලකයින් පවසන්නේ වෙබ් අඩවියේ භාණ්ඩ විශාල ප්රමාණයක් සාප්පු සවාරි කරත්තයට එකතු කිරීමෙන් පවතින උපරිම තොග ගණන සොයාගත හැකි වූ බවයි. එහෙත් ව්යාපාරික ආරංචි මාර්ග පවසන්නේ මෙය පසුබෑමක් නොව ජාත්යන්තර ව්යාප්තිය සඳහා සූදානම් වීමක් බවයි.
44 හැවිරිදි මේගන්, ඇයගේ 'With Love, Meghan' රූපවාහිනී වැඩසටහන හරහා මෙම භාණ්ඩ ප්රවර්ධනය කළද, ප්රමාණවත් තරම් නරඹන්නන් නොමැති වීම නිසා එහි තුන්වන අදියරක් නිර්මාණය නොවන බව වාර්තාවල දැක්වේ. Page six ඇසුරිනි.
දෙවන අදියර වසරේ අවසන් මාස හතර තුළ නරඹා ඇත්තේ මිලියන 2 ක් පමණක් වන අතර එය නෙට්ෆ්ලික්ස් හි වැඩසටහන් ලැයිස්තුවේ 1,217 වන ස්ථානයට පත්ව තිබේ. කෙසේ වෙතත්, මේගන් පවසන්නේ ඇයගේ ව්යාපාරය වේගයෙන් වර්ධනය වන බවත්, එය ලොව පුරා ව්යාප්ත කිරීම ඇයගේ අරමුණ බවත්ය.
