මෙවර බ්රෝඩ්වේ (Broadway) ඉතිහාසයේ වාර්තාගත ආදායමක් උපයපු, ප්රේක්ෂකයන් ආදරයෙන් වැළඳගත් වසරක් වුණු නිසාම සම්මාන රාත්රිය පුරාම තිබුණේ පුදුමාකාර උද්යෝගයක් සහ ජීවගුණයකින් පිරුණු වාතාවරණයක්.
මෙවර සම්මාන උළෙලේ ප්රධාන නිවේදිකාව ලෙස කටයුතු කළේ ලෝකප්රකට පොප් ගායිකා පින්ක් (Pink). ඇය වේදිකාවට ගොඩවැදුණේම "Lady Marmalade" ගීතයේ අපූරු සංස්කරණයක් ගායනා කරමින්. ඒ වෙනුවෙන් මෙවර සම්මාන සඳහා නිර්දේශ වූ සියලුම සංගීත ප්රසංගවල රංගන ශිල්පීන් ඇය සමඟ එකතු වීම විශේෂත්වයක්.
මෙවර හොඳම නාට්යයට හිමි සම්මානය දිනාගත්තේ 1970 දශකයේ කාන්තා විමුක්ති ව්යාපාරයේ කතාවක් රැගත්, මීට පෙර පූලිට්සර් සම්මානයෙන්ද පිදුම් ලැබූ බෙස් වෝල්ගේ (Bess Wohl) "Liberation" නාට්යයයි. මේ සමඟින් බෙස් වෝල් ටෝනි සම්මාන ඉතිහාසයේ හොඳම නාට්යයට හිමි සම්මානය දිනූ හතරවැනි කාන්තාව බවට පත්වුණා.
එමෙන්ම ප්රවීණ නළු ජෝන් ලිතගෝ (John Lithgow) "Giant" නාට්යයේ රෝල්ඩ් ඩාල්ගේ චරිතය වෙනුවෙන් හොඳම නළුවා සම්මානය දිනාගත් අතර, වයස අවුරුදු 80ක් වන ඔහුගේ තෙවැනි ටෝනි සම්මානය මෙය වීම කැපී පෙනෙනවා. මීට අමතරව ප්රසිද්ධ නාට්යයක් වන "Death of a Salesman" හි රංගනය වෙනුවෙන් ලෝරි මෙට්කාෆ් (Laurie Metcalf) ඇගේ තෙවැනි ටෝනි සම්මානය දිනාගත්තේ හොඳම සහය නිළිය ලෙසයි.
සංගීතමය නාට්ය (Musicals) අංශයෙන් මෙවර දැඩි තරඟකාරීත්වයක් දක්නට ලැබුණා. "The Lost Boys" සහ "Schmigadoon!" නාට්ය ද්විත්වයම සම්මාන නිර්දේශ 12 බැගින් ලබා පෙරමුණේ පසුවූ අතර, 1987 වසරේ සුප්රසිද්ධ වැම්පයර් චිත්රපටය ඇසුරින් නිර්මාණය වූ "The Lost Boys" හි රංගනය වෙනුවෙන් ෂොසානා බීන් (Shoshana Bean) හොඳම සහය නිළිය සම්මානයෙන් පිදුම් ලැබුවා.
තවද, ප්රකට "Cats" සංගීත ප්රසංගය නිව්යෝර්ක් Ballroom සංස්කෘතියට ගැළපෙන සේ අලුත්ම මුහුණුවරකින් වේදිකාගත කළ "Cats: The Jellicle Ball" වෙනුවෙන් සයිලෝන් ලෙවිංග්ස්ටන් සහ බිල් රවුෂ් හොඳම අධ්යක්ෂණයට හිමි සම්මානය දිනාගත්තා.
සම්මාන ප්රදානයට අමතරව බ්රෝඩ්වේ වේදිකාවේ අතීත සොඳුරු මතකයන් අලුත් කළ විශේෂ සැමරුම් කිහිපයක්ම මෙවර වේදිකාව හැඩකළා. "Chicago" නාට්යයට වසර 30ක් පිරීම නිමිත්තෙන් ක්වීන් ලතීෆා (Queen Latifah) මෙහෙයවූ උපහාරාත්මක අංගය සහ "A Chorus Line" නාට්යයේ 50 වැනි සංවත්සරය වෙනුවෙන් ලබන වසරේ බ්රෝඩ්වේ වේදිකාවට එන රේචල් සෙග්ලර් (Rachel Zegler) ඉදිරිපත් කළ විශේෂාංගය ප්රේක්ෂකයන් මහත් ඉහළින් වැළඳගත්තා. නවීන විලාසිතා, ආකර්ෂණීය රංගනයන් සහ සංවේදී මොහොතලින් පිරුණු මෙවර ටෝනි සම්මාන රාත්රිය, කලාවේ සැබෑ ජීවය සහ ප්රාතිහාර්යය යළිත් වරක් ලෝකයටම පසක් කර දුන් සැඳෑවක් වුණා කිවහොත් නිවැරදියි.
